الـسـلام عليكم ورحمة الله وبركاته

هذي اهم صفحة بالمنتدى, فيذا بتلقون انظمة وقوانين شطحه, ونظام العقوبات والنقاط, وألقاب الأعضاء, ومستوى التقييم

وكل شي اداري نشرحة لكم فيذا, وبعد المواضيع الإدارية الهامه لشرح نظام منتديات شطحة, كيف وليه, وليه لا .. ؟!

( قزقز بكل شي فيذا عشان تعرف راسك من رجلينك ) <<ادري مالها دخل, بس قلت اسوي اكشن

قبل مانبدا بالقوانين ونقول الصح تسذا, مهوب تسذا .. هذي بعض المواضيع اللي تشرح نقاط هامه بالمنتدى :

• صور الرتب , ومتى توصل للرتبة الجديدة .. وعدد المشاركات اللازمة

انظمة وقوانين شـبـكـة ومـنـتـديـات شـطـحـة

( سو تسذا, ولا تسوي تسذا )

بنحاول قد مانقدر على منع الردود والمواضيع والأشياء اللي فيها خنفبه ومالها سنع, وصعب اننا نتابع كل شي بوقته, عشان تسذا أي شي يكتب تراه يعبر عن رأي اللي كتبه فقط, وحنا غير مسؤولين عنه..

البند ( أ ) : الــقـوانـيـن الـعـامـة

فقرة رقم :

1. دعايات بالمنتدى, كل من هب ودب تعالو شوفو منتدياي تراه فله .. باص خدمة اجتماعية موب منتدى صار.
2. الدين, هذا المنتدى للمسلمين من أهل السنه والجماعه, موب يطب لي شيعي سادح لي موضوع كيف تجلد نفسك.
3. السياسة والسياسه, لا تخلوننا نرووح ملح .. تكلمو عن اللي تبون بس المدح والمدح ... عليكم بالمدح
4. العنصرية, القحاطين يطقعون بالمدري وشو , ولا العنوز ازين من مدري وشو.. تكلموا باللي تبون, الا العنصرية.

البند ( ب ) : قـوانـين الـسـوالـيـف والحـتسـي الماصخ.

فقرة رقم :

1. التلميحات المهوب زينة, كلام (معناه) دزليل أدب, دزليل حيا, دزليل خاتمة, ويخدش الحياء العام.. موب علينا تلمح لشي ٍ ماهوب زين, وتقول ماقلت حتسي, بس لمحت. ]للتلميحات الوصخه بزياده – تقديري[

2. كلام مهوب زين, كلام صريح وواضح منزوع الأدب, منزوع الحيا, منزوع الخاتمة وإنتحاري, هاليي مخربها مره وكاتبن لي رد انتحاري سب ولا كلام حق شوارع. ]تقديري[

3. هواش وتلاعن, مابعد قلبنا منتدانا حلبه WWF للحين, عشان تسذا اي ثنين يتهاوشون ويطول الهواش بدون اي حل, كلهم بينجلدون وبتنتمصع اذانهم, خلك انت الكبير ولو واحد بدى بالهواش رح بلغ الإداره والعقوبه بتكون عليه بس ومضاعفه, اما لو كلكم تهاوشون بتكون المخالفه قطه لك وله.

4. تخريب الموضوع, وهذا يعني انك تقلب الموضوع شات, تسولف بكل شي .. وتغير الموضوع, وأي موضوع ينقلب شات .. بنشوف اول واحد غير السالفه وبتكون على راسه.. ناقشوا في حدود الموضوع لو تبون 600 صفحه.
   
   
5. مغازل عام, جنون الخرفان لملاحقة التيوس, تقعد تلاحق لي وحده من موضوع لموضوع وكومنتات غزل, واحبس, وياحبيلس, ويازين مواضيعس, ووش رايس تتزوجيني.. ]العقوبه تطبق عند الشكوى فقط[

ملاحظة: صح قلنا بـ ₪ إشطحها وتوكل ₪ مسموح الذب بكل انواعه, وترا محذرين ومنبهين اللي بيزعل يتفرج من بعيد, سعه صدر فيذاك ووناسه, وكلن يمون على الثاني. مالنا خلق احد شوفو ذا حطيت موضوع وحطمني L .. ولا ذا مدري وشو .. الزعول فيذاك كلنا بنطب عليه, مهم: اللي بيسب ياويله, والسب غير الذب وعلى قولتهم ذب "نظيف" اما اللي يسب بنخفس به الأرض, ماتعرف تفرق بين السب والذب, لا تذب <<وش فيهم بالعين حبحر ذولي

البند ( ج ) : قـوانـين قوانين الصورز والفديوز والأصواتز وكل الـ ملتي ميديا (للقراوى= يعني الوسائط المتعددة).

فقرة رقم :

1. أغاني , المواضيع أو المقاطع هدفها الأساسي الأغاني سواء عربي, اجنبي, هندي, سيلاني, افريكانا, طنق بنق .. كلها ممنوعه. يعني موب تنزل لي البوم فعيص القاظي, جديد 2007.

اذا كان مقطع او فديو عن شي ثاني, بس فيه اغاني .. ميخالف,

2. مفاصيخ وقلة أدب "درجة أولى", (تحسون طيارة موب منتدى) .. هذي الله يسلمكم اذا حاطين لي صوت فيه كلام وصخ من الدرجة الأولى, ولا صور أو فديو فيه مفاصيخ مصلوخين مره و فيها مفاتن (كلن يدري وشي المفاتن, همن يجينا احد يقول احسبن ذا عادي).
   
3. مفاصيخ وقلة أدب "درجة سياحية", (خشينا جو مع الطيارة) .. هذي نفس اللي قبل لاكن اقل, يعني لو كلام وصخ على خفيف, وصور موب كلش مصلوخين, طالعن شوي منا وشوي مناك .. ]وتراه تقديري[

البند ( د ) : قـوانـين الشطحات الخاصة وحركات تحت الطاولة ( الرسائل الخاصه ).

طبعا هينا بالمنتدى فله ووناسه ونقاشات وكل واحد يشطح برايه, ولا نبي فله مع مصاخه, وإزعاج الرسائل هذي ترا من اهم العقوبات اللي بتتنفذ وبقوه وبكل صرامه وجرأه واحساس بالمسؤوليه ومنب متساهلين مع اي شي من الفئه الظاله اللي يلعبون على بناتنا وحركات نص كم ..واهم شي الديموقراطيه ولا يهون ابو متعب.. << خلاص خلاص وصلت الفكره !!

ملاحظة مهمه: عقوبات الرسائل الخاصه لا تـُـطبق الا عند الشكوى من قبل الضحية. << وجع جريمة قتل موب مسج

فقرة رقم :

1. مغازل وتميلح, جنون الخرفان لملاحقة التيوس, تقعد تلاحق لي وحده وباثرها بالرسايل غزل, واحبس, وياحبيلس, ويازين مواضيعس, ووش رايس تتزوجيني.. ونجيب بالرفاه والبنين, ومنس المال ومني العيال ومدري وشو.

]في هذي الناحية العقوبة تكون (اساءه استخدام الرسائل الخاصه), فقط[

2. ثنين في واحد, (موب شمبو ترا) هذا لما يخالف احد بنود قوانين المنتدى, في الرسائل الخاصه, يعني مثلا صورة وصخه, أو هواش أو سب ! وفي الرسائل الخاصه.

]يطبق عليه عقوبه الفعله الشنيعه الأولى + عقوبه اساءة استخدام الرسا\ل الخاصة, فقط[

البند ( هـ ) : قـوانـين دس الخشوم ولقافة بعض الناس.

طبعا كتبنا قوانين لأغلب الأشياء عشان تكونون على معرفه ودراية عامة, ونحاول قد مانقدر نطبقها حنا يالإداريين والمشرفين وما الى ذلك (متعوب عليها) .. المهم انه يجيك ناس مصاله احيانا, كنه أرض المنتدى حقت ابوه, ولا منتدى امه, اقول يالمشرف.. حط على ذا عقوبه , اقول ورا ماتطردون ذاك ؟ اقول ورا ما.. كنه فاتح له الهيئه العامه لإزعاج المشرفين.

ملاحظة مهمه: شفت واحد مخالف؟ قم ورح بلغ عنه! بس. عن طريق الزر الموجود تحت كل اسم عضو, واذا صرت صادز بيجيك نقاط تقييم.

وبدون فقرات, حركات المفروض تحط له عقوبه, حط لهذا مدري وشو, ليه ماتحط له, ليه .. الخ

ترا فيه اداره يعني . << عصبوا

البند ( و ) : قـوانـين الـتـسجـيـل والأسامي.

فقرة رقم :

1. تراكم انتم اللي تختارون اساميكم موب حنا ! موب كل شوي ناطين لنا غيروا اسمي غيرو ااسمي, ولا ماعجبني ابو جلمبو .. ابيه مهجد عيال الحاره ولا اقول خلوه مدري وشو.. مابعد فتحنا خدمات اجتماعيه فيذا.

بس عشاننا نحبكم .. كل واحد له مرتين يغير فقط, منتوب جيمس بوند كل شوي محتاجين هويه جديده

2. تسجيل بأسماء أدارة, حركات تسجل بإسم "المدير" .. ولا "شطحه" ولا اي اسم اداره, للأسف نمنع هذي الأسامي.

3. اسامي نص كم, حركات الزحيفه والزقرتيه موب لازم فيذا.

4. تسجيل بإسم موجود سابقا, وحركات اللي تحط لي مدااات .. وتاء مربوطه ومدري وشو , اذا جت اي شكوى بنحذف الجديد ونخلي القديم ,

وسلامتكم

نظام الـنـقـاط للمخالفات

الله يسلم قلوبكم هذا نظام النقاط للمخالفات, بحيث اي احد يسوي مخالفه يوضع في رصيده نقاط مخالفه, وهالنقاط تروح بعد فتره. يعني تبدى لمده معينة..

وطبعا أهم شي, انه اذا وصل الشخص لعدد معين من النقاط, يطبق عليه عقوبه تلقائيه من المنتدى.

يعني عشان نريحكم وتدرون عن كل شي وكل القوانين عندنا.  

أي مخالفه غير موجودة بالقائمه لا تطبق عليها نقاط, بل ترفع المشكلة الى الإدارة وينظر فيها وتطبق عقوبه تقديريه + اضافة المخالفه للقائمة 
 
 
ملاحظة : المخالفات اللتي باللون الأحمر هي مخالفات خاصه, لاتنتمي لأي بند.. يعني ميب موجوده بالقوانين فوق

ما يترتب على نظام النقاط من عقوبات